සීඩී / ඩීවීඩී වල දත්ත ගබඩා කෙරැවට වැඩක් නැද්ද?

පේන්නේ ඒ වගෙයි. ලංකාවේ අපි එදිනෙදා පාවිච්චි කරන සීඩි ඩීවීඩී වලට ඇත්තේ ඉතා කෙටි ආයු කාලයක් බවයි පෙනෙන්නේ. අවුරැදු දෙක තුනකදීම ඒවායේ ඇති දත්ත ඛාදයට ලක්වෙන්නට පටන් ගන්නවා. ඒත් සීඩී ඩීවීඩී වල ආයු කාලය තීරණය කරන සාධක කීපයක් තියෙනවා.

• සීඩී වර්ගය සහ කොලිටි එක.
• ඩිස්ක් එකට දත්ත බර්න් කිරීමේ කොලිටි එක - බර්න් කරන්නේ උපරිම වේගයෙන්ද මධ්‍යම වේගයෙන්ද වගේ කාරණා. අධික වේගයෙන් බර්න් කලොත් දත්ත ඔක්කොට රයිට් නොවෙන්න ඉඩ තියෙනවා.
• ඩිස්ක් එක පාවිච්චි කරන විදිය - පරෙස්සමින්ද, නැත්තම් සැලකිල්ලක් නැතුචද කියන එක.
• පාරිසරික තත්ව - උෂ්ණත්වය, ආර්ද්‍රතාව වගේ තත්ව. සාමාන්‍යයෙන් සෙල්සියස් අංශක 25 කුත් අර්ද්‍රතාවය 50% කුත් වගේ ඇති පරිසරයක් ගබඩා කලොත් ඩිස්ක් එකේ ආයුශ වැඩි වෙනවලු.

ඩිස්ක් එක පරෙස්සමින් පාවිච්චි කලොත් ‍එහි ආයුශ දික් වෙන බව අමුතුවෙන් කියන්න ඕන නෑ. ඒත් ඩිස්ක් එකට නිශ්චිත ආයු කාලයක් තියෙනවා. කාලය ගතවෙන කොට, ඩිස්ක් එක මතුපිට ඇති ලේයර් එක (මේකේ තමයි දත්ත ගබඩා වෙන්නේ. හදා තියෙන්නේ ගෝල්ඩ් හෝ සිල්වර් ඇලෝයි වගේ දේවල් වලින්) ඛාදනයට ලක් වෙන්න පටන් ගන්නවා. දැන් ඒක පරිගණකයකට දැම්මාම ඒක හිරවෙන්න තියාගන්නවා. මුළින් මුළින් පොඩ්ඩක් ඩැමේජ් වෙලා තිබුණට ඒක හොයන්න බෑ. මොකද ඩිස්ක් ඩ්‍රයිවර් එකෙන් Disk Errors හරිගස්සන නිසා. ඒත් ටික ටික සීඩී එක කරප්ට් වෙලා ඒකේ ඇති error සෙක්ටර්ස් ගාන වැඩි වෙනකොට, අන්තිමේදී ඩ්‍රයිවර් එකට දත්ත රීඩ් කරන්න බැරැව යනවා.

සිල්වර් ලේයර් එක මලකවන ප්‍රධාන සාධකයක් ලු වායුගෝලයේ සල්ෆර් ඩයොක්සයිඩ්. මේ නිසා සීඩී ඩීවිඩී පිරිසිදු වාතය තියෙන තැන් වල තැබීම සුදුසුයි. මොකද සල්ෆර් ඩයොක්සයිඩ් තියෙන්නේ දූෂිත වාතයේ නිසා. තව, රස්නෙ තැන් වලත්, යූ වී කිරණ එන තැන් වලත් සීඩී තියන්න හොද නෑ.

මේවා කොහොම කෙහොම උනත්, ඉතා දීර්ඝ කාලීන විදියට දත්ත ගබඩා කිරීමට අපි එදිනෙදා කඩෙන් ගන්න සීඩී ඩීවිඩී සුදුසු නෑ. එහෙමනම් කරන්න තියෙන්නේ, කාලෙන් කාලෙට පරණ සීඩී වල තියෙන ඒවා අළුත් සීඩී වලට කොපි කරන එකයි (පරණ සීඩී වල කාලේ පනින්න කලින්). ඒත් ඊට වඩා විස්වාසදායක ක්‍රමයක් තියෙනවා. ඒක තමයි දත්ත අන්තර්ජාලයේ ගබඩා කිරීම. මෙම සේවය නොමිලේ දෙස වෙබ් අඩවි තියෙන නිසා. ඒත් අඩු වේග අඩු ධාරිතා අන්තර්ජාල සම්බන්ධතා තියන අයට මේ ක්‍රමය අමාරැයි - විශේෂයෙන්ම දත්ත වල ප්‍රමාණය ගොඩක් වැඩි නම්. ඒවයේ ගබඩා කරන්න යොදා ගන්න පුළුවන් ජාතියේ ඉන්ටර්නෙට් කනෙක්ෂන් එකක් තියෙනව නම් හොදයි. හැබැයි ඒ වෙබ් අඩවි සේවයෙන් ඉවත් වුණ දාට (අර Yahoo Geocities වලට උනා වගේ), එහෙම නැත්තම් නොමිලයේ සේවාව සැපයීම නතර කරපු දාට, අපි ඒවායේ ගබඩා කරපු දේවල් වලට සුවිප් තමයි..

ප.ලි: ඉන්ටර්නල් / එක්ස්ටර්නල් හාඩ් ඩිස්ක්ස් ගැන කීවොත්, ඒවාත් හැමදාටම තියෙන්නේ නෑ. සමහර විට ඒවායේ ආයු කාලය වසර 5 6 ක් වෙන්න පුළුවනි, එහෙම නැත්තම් ඊට අඩු හෝ වැඩි වෙන්න පුළුවනි. ලෝකයේ සියල්ල අස්ථිරයි කීවේ කට කහනවටයැයි, හිකිස්!

වින්ඩෝස් වලට හැදූ සොෆ්ට්වෙයා උබුන්ටු ලිනක්ස් වල run කරන්නේ ‍කොහොමද

මේකට විසදුව වයින්! ‍ඒ කීවේ, අපි නිතර පාවිච්චි කරන වින්ඩෝස් මෘදුකාංග උබුන්ටු වල පාවිච්චි කරන්න බැරි නිසා දුකට වයින් බොන්න කියන එක නෙමේ. වයින් කීවේ, වින්ඩෝස් මෘදුකාංග වින්ඩෝස් නොවන පරිගණක පද්ධති වල ධාවනය කරන්න පුළුවන් කරවන Compatibility layer එකක්. ‍මේක උබුන්ටු වල‍ට ලේසියෙන්ම ඉන්ස්ටෝල් කරගන්න පුළුවන්.

මෙහෙමයි ඉන්ස්ටෝල් කරන්නේ:

• System->Administration->Software Sources යන්න (පහත රෑපය).
• Software Sources බොක්ස් එකේ "other software" ටැබ් එකට ගිහින් "Add" බට්න් එක ක්ලික් කරන්න.
• දැන් විවෘත වෙන බොක්ස් එකට මේ කෝඩ් එක කොපි පේස්ට් කරන්න: ppa:ubuntu-wine/ppa'. "Add source" බට්න් එක ක්ලික් කරන්න.
• දැන් Software Sources close කරන්න. එතකොට package information reload කරන්න අහයි. ඒකට ඉඩ දෙන්න.
• සියල්ල හරියට සිද්ද වුණා නම්, දැන් උබුන්ටු වල Application මෙනූ එකේ Wine සබ්-මෙනූ එකක් ඇතිවෙලා තියෙන්න ඕන. මේ මෙනූ එකට තමයි දැන් අපි උබුන්ටු වල ඉන්ස්ටෝල් කරන වින්ඩෝස් මෘදුකාංග යන්නේ.



දැන් වින්ඩෝස් වලදී කරනවා වගේම, Setup ෆයිල්ස් ඩබල් ක්ලික් කරලා වින්ඩෝස් මෘදුකාංග උබුන්ටු ඇතුලේ ඉන්ස්ටෝල් කරන්න පුළුවන්. ඉන්ස්ටෝල් උනාම, ප්‍රෝගෑම් එකට ලින්ක් එකක් වයින් මෙනූ එකට යාවි. දැන් ඒක ක්ලික් කරලා වැඩසටහන ක්‍රියාත්මක කරන්න පුළුවන්.

කොහොම වුනත්, හැම වින්ඩෝස් මෘදුකාංගයක්මත් වයින් වලින් රන් කරන්න බෑ. උදාහරණයක් විදියට ‍ඇඩෝබි CS3 වැඩසටහන් එහෙම වයින් වලින් ඉන්ස්ටෝල් කරන්න තවම බැහැ. .Net තාක්ෂණයෙන් ක්‍රියාත්මක වෙන වැඩසටහන් ඉන්ස්ටෝල් කරන්නත් වෙනම ක්‍රමයක් පාවිච්චි කරන්න ඕන. ඒත් ටිකක් පරණ වැඩසටහන් නම් වයින් වල හොදට වැඩ කරාවි

‍මගේ හිතට ඇල්ලුව flv වීඩියෝ කන්වර්ටර් එක.

ටික කාලෙක ඉදන් මම හොය හොයා හිටියා flv වීඩියෝ ෆයිල්ස් වෙන ෆෝමැටි වලට කන්වර්ට් කරන්න පුළුවන්, ඇනයක් නොවෙන සොෆට්වෙයා එකක්. ඇනයක් නොවෙන කීවේ, සමහර සොෆ්ට්වෙයා තියෙනවනේ කියපු වැඩේ නොකර ගණන් උස්සන ජාතියේ ඒවා. අනික, සමහර වීඩියෝ කන්වර්ටර්ස් හරි හිමින් තමා වැඩ. Flv කීවේ, ඔය Youtube වගේ සයිට් වල තියෙන ෆ්ලෑෂ් වීඩියෝ බව අමුතුවෙන් කියන්න ඕන නෑ.

ඔන්න ඉතිං කොහොම හරි හිතට අල්ලන සොෆ්ට්වෙයා එකක් හම්බුනා, ඒකේ නම තමා flv converter. හදලා තියෙන්නේ Aone software කියන සමාගමෙන්. flv converter කීවට මොකද මේකෙන් ඕනම ඕඩියෝ වීඩියෝ ෆෝමැට් එකක් වෙන ඕනම ඕඩියෝ වීඩියෝ ෆෝමැට් එකකට හරවන්න පුළුවන්. මේක සපෝර්ට් කරන ෆෝමැට් ගැන කීවොත් මේවගේ: mp4, avi, DivX, XDiv, mpg, vob (dvd), wmv, mov, 3gp, mp3, wma, ogg, amr, etc. ඒ වගේම, මේකෙන් දැන් මේ කියන ඩිවයිසස් වලටම ගැලපෙන විදියටත් ඕඩියෝ ඩීඩියෝ කන්වර්ට් කරන්න පහසුකම් තියෙනවා: iPod, iPhone, Apple TV, Zune, Xbox, PSP, PS3 (gaming), Sony walkman, PMP.

කන්වර්ට් කිරිල්ල ඉතාම ලේසියි. කරන්න ඕන තමන්ට අවශ්‍ය වීඩියෝ එක සොෆ්ට්වෙයා එක ඇතුලට ඇදලා දාලා, ඕන නම් resulting වීඩියෝ එකේ කොලිටි එක, සයිස් එක එහෙම ටිකක් configure කරලා, Convert බට්න් එක ඔබන එක විතරයි. එක පාර වීඩියෝ දහය පහලවක් උනත් කන්වර්ට් කලෑකි. වීඩියෝ ෆයිල් එක තමන්ට ඕන සයිස් එකේ කෑලි වලට කඩලා කන්වර්ට් කර ගන්නත් මේ ප්‍රෝග්‍රෑම් එකෙන් පුළුවන්. මේ ෆීචර්ස් ඔක්කොම ප්‍රෝග්‍රෑම් එකේ යට පැනල් එකේ ‍තියෙනවා, හොය හොයා ඉන්න දෙයක් නෑ. යට පින්තූරෙන් පෙනෙන්නේ මේ සොෆ්ට්වෙයා එකේ ඉන්ටෆේස් එක. මේ තියෙන්නේ සොෆ්ට්වෙයා එක ඩවුන්ලෝඩ් කරන්න පුළුවන් ලින්ක් එක: http://www.aone-soft.com/flv_to_avi_mpeg_wmv_3gp_mp4_ipod_converter.htm

දැන් පරිගණක වෛරස් එකකට මනුස්සයෙකු ගේ ඇගට එන්නත් පුළුවන් ලු!

මෙහෙමයි ඒ කථාව,

RFID චිප්ස් ගැන ඔය ගොල්ල අහලා ඇති සමහර විට. මේ වෙන තෙක් නම් RFID චිප්ස් හොගක්ම භාවිතා කලේ, සත්තුන්ව ටැග් කරනවා වගේ වැඩ වලට. ඒ කියන්නේ ඔය විද්‍යාඥයෝ වගේ අය කැලෑවේ සත්තු ගැන පර්යේෂණ සමීක්ෂණ එහෙම කරන කොට, ‍ඒ ගොල්ල ‍මේ RFID චිප්ස් සත්තුන්ගේ ඇග ඇතුළට යවනවා - ඒ කියන්නේ ඉම්ප්ලාන්ට් කරනවා. දැන් ඒ සතා කැලේ කොහෙ ගියත්, උගේ ඇගේ තියෙන චිප් එක නිසා පර්යේෂන කරන අයට ඌ ඉන්නේ කොතනද කියලා දැන ගත්තෑකි. ඒත් දැන් මේ ‍RFID චිප්ස් තිබූ තත්වයෙන් වැඩි දියුණු කරලා තියෙනවා. දැන් ඒවා නිකම්ම ට්‍රැකිං ඩිවයිසස් වෙනුවට, කුඩා පරිගණක බවට වැඩි දියුණු කරලා තියෙනවා. දැන් ඒවා මිනිස්සුන්ගේ ඇගවල් වලටත් ඇතුල් කරන්න පටන් අරගෙන. ඉතින් මේවායින් කරන්නේ මොනවද?

එක සයිබර්නෙටික්ස් විඥාඥයෙක් මේ දවස් වල ඉන්නේ මේ චිප් එකක් තමන්ගේ අතේ හමට යටින් ඇතුල් කරගෙන. ‍ඒ චිප් එක නිසා, ඔහු ගේ ලැබ් එකේ ඉලෙක්ට්‍රොනික් දොරවල් එහෙම ඔහු එනකොට ස්වයංක්‍රීයව අගුළු ඇරිලා විවෘත වෙනව ලු. ඒ වගේ ම ඔහු ගේ සෙල්ෆෝන් එක අන්ලොක් වෙන්නේ ඔහු ඒක අතට ගත්තොත් විතරලු, වෙන කෙනෙකුට ඒක පාවිච්චි කරන්න බැහැ ලු. මේ වගේ තව ප්‍රයෝජන චිප් එකෙන් තියනවා. අර වෛරස් කථාව එන්නේ මෙතනදි. දැන් මෙහෙම චිප් කෑලි ඇග ඇතුලේ දාගෙන ඉන්න කොට, ඒ චිප් එකකට වෛරස් එකක් ඇතුල් වුනොත් මොකද වෙන්නේ? එහෙම වෛරස් ඇතුල් වෙන්න පුළුවන්, චිප් එක පරිගණකයකට සම්බන්ධ වෙලා තියෙනකොට (වයර්ලස් විදියට). ‍උදාහරණයක් විදියට, අර විද්‍යාඥයාගේ ඇගේ තියෙන සිකියුරිටි දොරවල් අරින චිප් එක ගැන හිතන්න. මේ චිප් එකට වෛරස් එකක් ගියොත්, ඒ චිප් එකෙන් ඇරෙන දොරට සම්බන්ධ පරිගණක පද්ධතියටත් ඒ වෛරස් එක බෝ වෙනවා. දැන්, දොර අරින්න කී-කාඩ් එකක් පාවිච්චි කරන වෙනත් කෙනෙක් ගේ කී-කාඩ් එකටත් මේ වෛරස් එක යන්න පුළුවන්. මේ විදියට මේ වෛරස් එක පැතිරී යන්න පුළුවන්.

මීට වඩා භයානක ප්‍රතිඵල ඇතිකරන උදාහරණයක් ගත්තොත්: දැන් සමහර ඉල්ට්‍රොනික උපකරණ තියෙනවනේ ‍වෛද්‍යමය කාරණා වලට ඇග ඇතුලේ සවි කරන. සමහර ඉම්ප්ලාන්ට් උපකරණ තියෙනවා හදවත එක්ක නැත්නම් මොලය එක්ක සම්බන්ධ වෙන. මේවාට වෛරස් ඇතුළුවුනොත්, ඒවා සවිකරලා තියෙන රෝගියාට දෙයියන්ගෙම පිහිටයි.

තාක්ෂණය තව දියුණු වෙනකොට, මේ වගේ චිප්ස් සහ උපාංග ඇග ඇතුලේ ඉම්ප්ලාන්ට් කරගෙන සිටින අය වැඩි වේවි. එතකොට එම උපකරණ වලට වෛරස් ඇතුළු වීම ගැන අදට වඩා අවධානයක් නියතයෙන්ම යොදන්න සිදු වේවි.